Sviðin jörð

Ég var að hugsa um að blogga um efnahagskrísuna, bankakrísu og hátt gengi sem er að sliga okkur hér í Revíugarðinum en ég ákvað að slá frekar á létta tóna. Þótt við séum flutt af landi brott og munum ekki taka slátur þetta árið þá sá Jón um að fylla upp í þjóðlega kvótann með því að svíða svið í gær. Já, við erum ekkert skárri en þessir útlendingar sem halda í sína siði fram í rauðan dauðann. Svo höfðum við ýsu úr frystinum í kvöldmat og brátt förum við að borða lambalærið sem Jón kom með að heiman síðast. Svo erum við svo heppin að Helga og Kolfreyja koma á morgun og þær eru þegar búnar að pakka niður seríosinu og orafiskibollunum. Við verðum því ekki í vandræðum með að halda í þjóðlegheitin á næstunni.

Um helgina fór ég út með nýjustu bestu vinkonum mínum sem búa hér í Revíugarðinum. Við ætluðum að fá okkur sússí og sjá Mama mia! en það endaði með að við fengum okkur spænskan mat og fórum síðan á Bláa hundinn sem er skemmtileg krá hér í nágrenninu. Síðan fór ég í pilates og er auðvitað enn með harðsperrur. Pilates er ekki beinlínis nein þrekleikfimi svo þolið mun sennilega ekki aukast hratt í þeirri iðju, en þetta er ægilega hollt og gott. Loks enduðum við með að  heimsækja Palla og Júlíönu, þar sem þeir bræður fóru að svíða svið, en við hin fórum í Frederiksberg Have sem er yndislegur garður hér rétt hjá. Við fengum síðan kjötsúpu í matinn þannig að við gerumst varla þjóðlegri en þetta.  

Allir að taka slátur

Ég held að hin hagsýna húsmóðir  (og þá er ég auðvitað líka að tala um karla) ætti að draga fram uppskriftabókina og taka slátur. Það er þjóðlegur og góður siður sem kostar lítið. Við höfum tekið slátur á hverju hausti í nokkur ár, ekki samt af hagsýnisástæðum heldur vegna þess að það er þrælgaman og markar upphafið á vetrinum. Það er greinilegt að efnahagsástandið er farið að koma við buddu landsmanna.

Óunnar kjötvörur vinsælar í dýrtíð

Í ,,eplamó"

Hér í Danmörku kemst maður ekki í berjamó en hins vegar fórum við í ,,eplamó" um helgina. Palli bauð okkur með út í sveit, á stað sem tilheyrir landbúnaðarháskólanum. Þar voru margar tegundir af eplatrjám sem bókstaflega svignuðu undan eplunum. Við tíndum epli í nokkra poka og ætlum að baka eplakökur, búa til safa og eplamauk úr uppskerunni. Við fengum frábært veður en hér er samt aðeins farið að hausta. Eftir ,,eplamó" lá leið okkar til Roskilde, eða Hróarskeldu. Roskilde er sérlega fallegur bær og þar er margt að skoða, s.s. dómkirkjan og víkingasafnið. Það var gaman að bregða sér í hlutverk ferðamanna og skoða sig um á nýjum stað.

Í október byrjar svo Haukur í leikskóla. Hann er búinn að fá pláss í Lindehuset, sama leikskóla og Leifur er á. Ég ætla því að fara að kíkja eftir vinnu eða skella mér á dönskunámskeið - þótt ekki sé nema til að sýna mig og sjá aðra.

Nammiskápurinn að tæmast

Við höfum verið svo upptekin við að borða allt nammið sem Steinvör kom með að ég hef bara ekkert komist í að blogga  Frystirinn er enn fullur, enda allt of hollt að borða ýsu ... en ætli ég neyðist ekki til þess nú þegar aukakílóin eru farin að hrannast á mig.

Við fengum góða heimsókn um helgina. Steinvör og Kristín Jóna komu og voru hjá okkur í fjóra daga. Krakkarnir voru að springa úr fjöri yfir því að hittast og það var margt brallað. Farið í tívolí, dýragarðinn og svo skoðað hvað er hér í nágrenninu. Þær voru heppnar með veður því um leið og þær voru farnar til baka kom haust hér í Danmörku. 

Lífið hér í Höfn (ég hef ákveðið að nota frekar gamalt og gott nafn á Kaupmannahöfn frekar en hið plebbalega Köben) er komið í fastar skorður. Leifur er búinn að vera í skóginum alla vikuna - þótt hann gráti úr sér augun þegar hann kveður okkur er hann kátur þegar hann kemur heim. Sem veit á gott. Rútan var komin í morgun þegar þeir feðgar komu út á leikskóla. Hann tók strax á rás því hann ætlaði ekki að missa af rútinni! En, svo þegar hann var sestur inn tóku tárin að renna. Hann sofnar því miður alltaf á leiðinni heim, sem þýðir að hann er enn erfiðari en vanalega að fara að sofa. Næsta ráð er að gefa honum flóaða mjólk - gott húsráð frá nágrannakonu okkar.

Hildur er búin að vera rosalega dugleg í skólanum, sem og að hjóla í skólann. Þetta er engin smáspotti!  Jón hitti Dorthe, kennarann hennar, í morgun og hún sagði að þetta gengi alveg svakalega vel. Hildur er farin að skilja heilmikið og tala smávegis. Þetta er semsagt allt að koma.

Svo er litli stubbur lasinn en við vonum að það gangi fljótt yfir.

Skólinn hjá Jóni er að komast á skrið. Í vikunni reifst hann svo heiftarlega við indverska bekkjarsystur sína í stórmarkaði að fólk hætti að raða í poka af undrun yfir þessari uppákomu! Það versta er að rifrildið snerist um að hann hefði gleymt að koma börnunum í pössun á réttum tíma! Þetta var reyndar (sem betur fer, því ekki vildi ég að hann ætti viðhald) sálfræðitilraun til að kanna viðbrögð fólks við pínlegum/óþægilegum aðstæðum. Aumingja Jón er hættur að versla í Fötex eftir þetta og fer nú bara í Lidl og Netto. Reyndar var tveimur úr bekknum hent út úr verslunarmiðstöðinni Frederiksberg Center, af öryggisvörðum, og dönsk kona fór að skipta sér af rifrildi annarra tveggja, og lét víst fúkyrðunum rigna yfir þá, fullum af kynþáttafordómum. Þegar henni var sagt að þetta væri skólaverkefni varð hún enn reiðari. En við hér í Revíugarðinum erum hvorki reið né leið heldur bara kát.

Þetta er mér að kenna

Þetta er bara af því að ég er flutt til Danmerkur og tími ekki að kaupa neitt í matinn. Er bara með fyrstinn fullan af íslenskri ýsu og lambakjöti ...

Danir spara við sig í mat

Klukkuð

Ég var klukkuð! Best að vinda sér í klukkuna:

Fjögur störf sem ég hef unnið um ævina:

• Afgreiðslustúlka í versluninni Rangá. Frahmlenging á búðarleiknum.
• Fiskvinnslutæknir í Hraðfrystihúsi Fáskrúðsfjarðar. Sérlega uppbyggilegt - eða þannig.
• Flugfreyja hjá Air Atlanta - mjög skemmtilegur tími.
• Umönnun aldraðra í Sankt Elisabeth Alten- und pflegeheim. Eftir það hef ég verið kölluð Schwester Sigrid í góðra vina hópi.

Fjórar bíómyndir sem ég held upp á

• Fjögur brúðkaup og jarðarför, alltaf sígild.
• Pulp Fiction, frábær mynd með óvæntri framvindu.
• Rocky 1, ég meina Silvester Stallone er laaaaangflottastur.
• Brúðguminn, meiriháttar mynd sem kom mér á óvart.

Fjórir staðir sem ég hef búið á

• Kolfreyjustaður, Fáskrúðsfirði. Fegursti staður í heimi.
• Fjarðarstræti, Ísafirði, þar kynntist ég Línu æskuvinkonu.
• Jafnakri, Garðabæ, draumhúsið og það sem ég sakna mest frá Íslandi ...Já, ég veit að það er skrítið en þetta er einfaldlega frábært hús.
• Elga Olgas vej, Kaupmannahöfn.... og er þá fátt eitt talið þar sem ég hef búið á 6 stöðum sl. 18 mánuði.

Fjórir sjónvarpsþættir sem mér líkar (ég horfi ekki mikið á sjónvarp en...)

• Beðmál í borginni. Kemur mér alltaf í gott skap. Ég elska þessa þætti. Ef einhver er í vandræðum  með að gefa mér gjafir þá fæst serían á DVD ...
• Aðþrengdar eiginkonur. Vildi að líf mitt sem hjemmegoende væri jafnspennandi og þeirra.
• Ljóta Bettý, Bettý er neflilega svo sæt.
• 24 dúndurþættir sem eru svo spennandi!!

Fjórir staðir sem ég hef heimsótt í fríum

• Kýpur
• Ísrael
• Írland
• Bandaríkin

Fjórar síður sem ég skoða daglega fyrir utan blogg

• mbl.is
• visir.is
• eyjan.is
• facebook.com

Fernt sem ég held uppá matarkynnis

• góðir ostar, svo sem Primadonna
• rjúpur
• eplakakan hennar ömmu
• góðir kjúklingaréttir

Fjórar bækur sem ég hef lesið oft

• Anna í Grænuhlíð, allar bækurnar
• Í barndómi, eftir Jakobínu frænku mína en þar skrifar hún um bernsku sína á Hornströndum. Afar gaman að lesa um langömmu mína og langafa og fleiri ættingja.
• Á morgun segir sá lati, bók um tímastjórnun og frestunaráráttu sem hrjáir mig. Þessi bók er alltaf á náttborðinu mínu og ég er einhvern veginn alltaf að lesa hana í þeirri veiku von að verða skipulögð og með allt á hreinu.
• Hús andanna, las hana oft þegar ég var yngri. Ætti kannski að tékka á henni fljótlega.

Fjórir bloggarar sem ég klukka (veit að það er hvort eð er búið að klukka þau)

• Helga
• Solla
• Sigrún
• Friðjón

Skemmtun og skovbörnehave

Þá er enn ein vikan byrjuð. Ég var búin að skrifa heljarinnar færslu um KRAM rannsóknina sem ég tók þátt í sl. föstudag en sú færsla hvarf út í loftið og ég veit ekki á hvaða bloggsíðu hún endaði. EN ... ég lenti semsagt í úrtaki hjá Lýðheilsustofnun Danmerkur (eða eitthvað) þar sem heilsufar mitt var kannað í þaula. Blóðþrýstingurinn var mældur, sem og hæð, þyngd og beinþéttni, það var tekið blóð, ég var látin hjóla og ég veit ekki hvað og hvað. Útkoman er sú, sem ég átti von á, að ég er við hestaheilsu en með lélegt þol. Kom mér ekki á óvart eftir 3 óléttur á 6 árum sem þýðir að það er erfitt að koma sér af stað í einhverja hreyfingu, fyrir utan að það er erfitt að finna tíma þegar maður á þrjá litla krakka. Mér var boðið að taka þátt í áframhaldandi könnun og vera með skrefateljara næstu þrjá mánuðina með það að markmiði að auka hreyfingu og taka 15000 skref á dag. Eftir þessa þrjá mánuði verður svo heilsufarið og þá þolið, mælt aftur og borið saman við daginn í dag. Mér leist vel á þetta ... en nenni þessu varla. Er að hugsa málið.

En að öðru. Var í dag með Leifi í aðlögun í skóginum. Þetta var dálítið sérstakt. Ég veit ekki alveg hvernig mér lýst á þetta! Hann fer einn á morgun. Ég ætla aðeins að bíða og sjá hvort við höfum hann áfram í þessum leikskóla. Í gær var svo hanastélsboð í skólanum hjá eiginmanninum. Við fórum öllsömul og það var mjög gaman að sjá þennan hóp. Virkilega múltíkúltí. Mig langaði mest að fara í þennan skóla líka. Fer kannski þegar Jón er búinn. Á sunnudaginn tókum við stefnuna á Strikið, bara svona til að viðra mannskapinn. Hittum Hönnu (móðursystur Jóhönnu Maríu, vinkonu Hildar) sem var í tívolíferð með dætur sínar. Á laugardaginn fórum við í Haustfest í SFO, eða tómstundaheimilinu hjá Hildi. Þar var grillað, boðið upp á kokteila á barnabarnum og svo var bjór fyrir fullorðna fólkið. Þetta var virkilega skemmtilegt. Svo enduðum við daginn á að heimsækja Íslendinga sem við höfum aldrei hitt áður en áttum með þeim skemmtilega kvöldstund. Í kvöld fengum við svo dúndurheimsókn frá Tobbu vinkonu sem kom keyrandi frá Svíþjóð. Við erum strax farin að planleggja heimsókn til hennar í viku 40 (svona skipuleggja Danirnir allt). Það tekur ekki nema 3 tíma að keyra til hennar. Já, og svo keyptum við hjólavagn í dag til að geta hjólað um allt með drengina. Keyptum notað, auðvitað. Enda orðin sparsöm og umhverfisvæn ... ja eða bara svona nísk!!